Avel em fenn
Radio Bro Gwened
BD "Bezhin glas" : dizemglev diwar an droidigezh vrezhonek
Ouzhpenn miz zo bremañ e oa krog da sevel bec'h war ar rouedadoù sokial diwar afer troidigezh vrezhonek ar vandenn-dreset Algues vertes, l'histoire interdite. Oberenn ar gazetennerez Inès Lérault hag an treser Pierre Van Hove. Gant An Amzer, un ti-embann eus Pornizh e Liger-Atlantel, eo bet graet war-dro an embann e brezhoneg.
Met kemmet da vat e oa bet labour an troer gant an embanner just a-raok na vije embannet ar vandenn-dreset e miz Gouere. Abalamour da se eo bet gourdrouzet an embanner bezañ kaset dirak ar justis gant an obererien ma ne vije ket tennet gantañ ar skwerennoù eus al levr hag a zo c'hoazh e gwerzh e stalioù-levrioù ar vro. Goulennet o deus groñs ivez digantañ adembann an oberenn dindan ur stumm asantet gante. Met n'en deus ket goulet an embanner plegañ. Rak hervezañ n'eo ket reizh ar c'hlemmoù graet outañ.
Kinnig a reomp deoc'h klevout santimant an troer, Tudual Karluer. Hennezh en deus bet digarez da reiñ e soñj er gazetenn Ya ! dija. Selaouomp anezhañ o tisplegañ gant peseurt spered en deus bet c'hoant da lakaat e brezhoneg ar vandenn-dreset « Bezhin glas, an istor difennet ».
Dre ur gemennadenn embannet war ar rouedadoù sokial eo bet gouvezet soñj an embanner. Hervezañ n'en deus ket an troer kinniget evel oa dleet ur skrid diouzh choazoù embann an embanner. N'en deus ket doujet ivez d'an termen lakaet d'achuiñ an droidigezh. Ha hervezañ bepred eo eñ an hini eo a zo kiriek ma n'en deus ket bet amzer da adlenn ar stumm bet kemmet gant an embanner a-raok ar moullañ.
Evit c'hoazh n'hon eus ket bet respont pozitivel ebet d'hom c'hinnigoù atersiñ digant tud all o deus bet ur perzh en afer-se.
Hiroc'h zo da lenn [war lec'hienn internet ar media Splann!] (https://splann.org/br/bd-bezhin-glas-istor-un-droidigezh-aet-da-fall/)
Pennad-kaoz gant Tomaz Laken
Avel em fenn - Lun 9 a viz Gouel-Mikel
Dimerc'her paset e oa kant hanter kant trakteur dirak prefetioù Breizh, da-heul disklâriadenn ar Stad e vank argant evit o faeiñ àr o labour doujusoc'h doc'h an endro, e framm an [MAEC] (https://agriculture.gouv.fr/maec-les-nouvelles-mesures-agro-environnementales-et-climatiques-de-la-pac) (Mesures Agroenvironnementales Et Climatiques). Goulven Troadeg peizant e Plonevez-Moedeg & Kristen Bodros staliet e Lannbaeron a zo o daou ezel e Kengevread ar Beizanted (Confédération Paysanne). Displeg a reont a-hed ar sizhun o rol èl laburizion-douar en afer-se. Pennad-kaoz ar sizhun get Maëlle Ausias (RKB) ar sizhun-mañ.
[Dañsal dindan ar glav] (https://www.youtube.com/watch?v=ov3FHl8j5Uo) a zo un teul-film a zoare a gont istoer Elen, tapet get krign-bev ar vronn, sevenet get Goulwena An Henaff. Un abadenn talvoudus da welet e mare Here-Roz. Hirroc'h er gronikenn Neventi [FR3] (https://france3-regions.francetvinfo.fr/bretagne/) e kompagnunezh Mael Gwenneg e karg ag an abadennoù e brezhoneg. Ur gronikenn nevez a vo adkavet bep Lun.
Ar wikend-mañ e veze roet tro-goug an erminig da 4 zen, Ronan Coadig, Monig ar Boulch, Joel Cornette ha Natalie Beauvais a zo bet enoret. Muioc'h àr an [ensavadur] (https://www.skoluhelarvro.bzh/ceremonie-des-hermines-2023/) e kompagnunezh Rowanon Kervella doc'h mikro Morgane Cotten (Radio Kerne).
Somatek e c'hell bout an droug er c'horf. Muioc'h àr an afer get ar medisin-bet Alan Goulwen er gronikenn yec'hed.
Keleier ar vro get Metig Jakez-Vargas.
Un abadenn kaset dre-eeun a Bondi get Enora Molac e studio Radio Bro Gwened.
Avel em fenn - Gwener 6 a viz Here
Un atersadenn war eeun gant Padrig Ferog evit komz deus darvoudoù miz Here e brezhoneg : atelieroù kan, staj kontadennoù hag ar pezh-c'hoari Twits a vo e Glenmor d'ar merc'her 11 a viz Here.
Keleier ar vro hag ar bed gant Metig Jakez-Vargas
Lodenn diwezhañ pennad-kaoz ar sizhun diwar-benn an drouized.
Kronikenn Daouarn ha pri gant ar poder Awen Prigent diwar-benn an turgn, ar mekanik a lak da dreiñ ar pri a-benn sevel ur pod.
Avel em fenn - Yaou 5 a viz Here
Atersadenn Awen Prigent diwar-benn Festival Blues an div rinier a vo e Benac'h etre ar 6 hag an 8 a viz Here.
Lodenn gentañ ar gronikenn Barzaz war levr Riwal Huon, Micha Riou & Gwastell ar Rouaned, gant Magali Baron ha Tomaz Laken.
Keleier ar vro hag ar bed kinniget gant Tomaz Laken
Pevare lodenn Pennad-kaoz ar sizhun war an drouized.
Avel em fenn - Merc'her 4 a viz Here
[Ur reportaj e gar Koneri war barrouz Louargad, er stal objedoù eil dorn La Bout'] (https://www.radiobreizh.bzh/episode/58888) . An embregerezh Euredenn, perc'hen war hangar lec'h m'emañ staliet La Bout', en deus c'hoant da werzhañ an dachenn. Ur reportaj gant Tomaz Laken.
Keleier ar vro hag ar bed gant Metig Jakez-Vargas
Trede lodenn Pennad-kaoz ar sizhun diwar-benn an druized.
Souten ar gevredigezh La Bout'
D'ar sadorn 23 a viz Gwengolo e oa deuet e-leizh a dud betek gar Koneri war barrouz Louergad ! Respontet o doa da c'halvadenn ar gevredigezh La Bout' a soursia eus ur voutik a ro un eil buhez d'an traoù bet implijet gant an dud. Dilhad, meubl, bitrakoù pe beseloù a vez kavet eno da brenañ marc'had-mat hardizh !
Met siwazh e c'hallfe bezañ rediet La Bout' da zilojañ abalamour m'emañ an embregerezh Eureden, hag a zo perc'henn war o zi, e sell da werzhañ anezhañ. Achuiñ a ray al lizher-feurm e fin ar bloaz ! Met talvoudus-bras eo al lec'h-se da galz a dud eus ar vro. Ur rekour eo d'ar re n'o deus ket aez da brenañ traoù ker pe c'hoazh d'ar c'hevredigezhioù ha da skol ar gumun a resev ur gwenneg bennaket digant La Bout' gwech ha gwech all. Dilennidi a oa deuet ivez disadorn betek porzh ti ar gevredigezh, da reiñ da c'houzout e oant prest da souten. Arnaud Toudig a oa aze. Hennezh zo koñsailher-rannvro en karg eus ar c'hevredigezhioù. Pe c'hoazh Frañsoa Marreg, maer Benac'h, a vo klevet ganeoc'h e penn kentañ ar pennad-komz.
Ha da glevout ivez er reportaj, Clothilde, Valentine, Nelly ha Remi...
Digor e vez La Bout' d'al lun ha d'ar merc'her diouzh ar beure ha kentañ sadorn bep miz goude kreisteiz...
Ur reportaj gant Tomaz Laken
Avel em Fenn - Meurzh 3 a viz Gouel-Mikel
Ganet eo ur liorzh lodet/rannet nevez e Pondi, krouet get ar gevredigezh Ekolokobio, liammet get Biocoop Callune. Andrea ar Gall prezidantez ar gevredigezh doc'h mikro Enora Molac, reportaj da glevout e penn kommañs an abadenn.
Kredennoù a vez get an drouized. Pascal Lamour (drouiz, apotiker ha soner) & Per Vari Kerloc'h (6vet drouiz meur Gorsedd Breizh) a zigor o bed, e pennad-kaoz ar sizhun mañ.
Adkavet ivez Carmen Le Bris, hanter bac'het e Irkoutsk e bro Rusi, Keleier ar vro get Erwan Blanchard ha Teñzor ar brezhoneg komzet get Padrig Drean.
Un abadenn kaset dre-eeun a Bondi get Enora Molac.
Avel em Fenn - Lun 2 a viz Gouel-Mikel (Here)
D'an 13 ag ar miz-mañ e vo votet ur c'hinnig arall àr ar glifozat, degaset get ar C'homision European. Ret e vo d'ar broioù Europad lâr ma faot dezho ampellaat implij ar louzoù-se beteg ar 15 a viz An Azvent (Kerzu) 2033... Da lâret eo 10 vlez ouzhpenn evit pezh a oa bet disklêriet. Ur gudenn a zo neoazh, dispaket get Reporterre: Global 2000 ha PAN Europe (Pesticide action network) o deus embannet e oa bet dilemmet o studi àr ar glifozat get Bayer [muioc'h amañ] (https://reporterre.net/Des-etudes-defavorables-au-glyphosate-ecartees-de-son-evaluation) . Kounaret eo ar c'hevredigezhioù har ur bochad tud er gevredigezh, en o zouez Jean-Paul Runigo ag ar gevredigezh Dour ha Stêrioù Breizh. Klevet e vo ivez Jean-Jacques & François, gouzañverien kleñvedoù parkinson, liammet hrewez o medisin get implij ar louzoù e-pad o buhez labourizion douar. Atersadennoù get Yuna Cojean.
Adkavit ivez taol-immor ar c'hronikour Loeiz Belleg, da-geñver pezh erruet e Seglian... Pa gomzer ag an diforzhioù sell etre anamezeion a laosk an natur ober he labour, hag ar re arall àr-dro, feuket ne vehe ket "brav" da welet...
Ur liamm ispisial o dez an drouized get an natur hag ar bed arall. Pennad-kaoz ar sizhun a vo a-ziàr o feson da welet ar bed ha d'en em aoziñ, get Per Vari Kerloc'h, drouiz meur Gorsedd Breizh, ha Pascal Lamour, apotiker, soner ha drouiz ivez, èl just.
Avel em fenn - Gwener 29 a viz Gwengolo
Gant ar gronikenn Barzaz ez eo bet kroget an abadenn-mañ, diwar benn al levr Ar gorollerez vihan.
Un atersadenn gant Ti ar Vro Sant Brieg evit komz deus o distro-skol, deus ur bodad lenn nevez-flamm ha deus o nozvezhioù sonerezh Breizh.
Keleier ar vro hag ar bed kinniget gant Anton Burel
Lodenn diwezhañ Pennad-kaoz ar sizhun diwar-benn Chareadeg an dour a zo bet fin miz Eost.
Avel em fenn - Yaou 28 a viz Gwengolo
Un atersadenn gant ar strollad sonerezh Combo Chimbita, tud a vro Kolombia o vevañ e New York, dre bellgomz gant Enora Molac.
Da c'houde [ar gronikenn Daouarn ha pri, gant Awen Prigent, poder e Benac'h o komz deus e labour gant ar pri.] (https://www.radiobreizh.bzh/episode/58803)
Keleier ar vro hag ar bed gant Erwan Blanchard
Pevare lodenn Pennad-kaoz ar sizhun diwar-benn Chareadeg an dour, gant Odile ha Tugdual deus mikro Tomaz Laken.