Avel em fenn

Ar pobl Mapuche a zo orin a Amerika-Su, eus un dachenn kazi ken bras ha Bro C’hall ledet a-bep-tu eus chadenn menez an Andes, e kreisteiz Santiago de Chile,. Ur pobl a zo bet gwallgaset a-hed ar c’hantvedoù gant ar galloudoù o ren Chile hag Argentina, difennet dezhe komz o yezh, ar Mapudungun, ha difennet dezhe bevañ en un doare hengounel. Hervez ar statistikoù e vefe bremañ tro 300 000 a dud a-orin Mapuche en Argentina, hag 1 milion anezhe e Bro Chile. Darn vrasañ anezhe a vev er c’hêrioù bras, pell-mat neuze deus o sevenadur hag a zo liammet strizh d’an natur, d’an douar.
Karen Wenül Gallegos Munoz a zo o chom e Las Cruces, e Kornog Santiago de Chile. Labourat start a ra da glask adreiñ lañs d’ar sevenadur Mapuche en he bro. Chañs meump bet degemer anezhi e Bro Dreger a-drugarez da Odile Yvon ha Bleuñvenn Konan, div gamaradez dezhi deus Lannuon. E-pad dek devezh neuint graet tro skolioù, skolioù-veur, mediaouegoù ha tavarnioù da animañ atalieroù ‘benn reiñ da welet ha da glevet d’ar re vras ha d’ar re vunut, amañ, petra eo kultur ar Mapucheed.
Hag ar raktres brav-se ne vefe bet kaset a-benn panevet youl ha nerzh Skol Diwan Logivi Lannuon evel-just ! Ur raktres ne ra ket met kregiñ evit ar poent, hag a vo peurlipet ha graet adarre emichañs !
Ar pennadig-kaoz-mañ a zo bet enrollet e-kerzh an atalier kaset gant Karen e klasad CE1 CE2 Danièle Saliou d'an 9 a viz du 2022.
Dispaket he oa Karen he malisennad kontadennoù ha kanaouennoù e Mapudungun, he binviji-muzik hag he c’hoarioù da lakaat bugale Diwan da zizoloiñ he yezh hag he sevenadur. Ha plijadur ‘zo bet!
Mersi-bras da gKaren Wenül Gallegos Munoz, Bleuñvenn Konan, Odile Yvon, Ludovic Ar Ru rener Skol Diwan Lannuon, Danièle Saliou skolaerez CE1 CE2 hag he skolidi.
Atersadenn gant Rose Troadeg.

Pedet eo an dud a-du gant an emrenerezh da zont da Garaez disadorn. Evit un emgav aozet gant ar gevredigezh Bretagne Majeure ha soutenet gant Pour une Bretagne Autonome, ur strollad bodet ennañ tud gant mennozhioù politikel liesseurt. Unan eus palioù ar vodadeg a vije bet dastum pennoù bras ar strolladoù politikel o doa votet un het evit an emrenerezh e kuzul Rannvro Breizh e miz Ebrel tremenet. Met un tamm « couac » zo bet, hervez Kristian Troadeg, a zo e-mesk aozerien kollok disadorn. Un trakt bet dasparzhet e fin miz Here da goulz Gouel levrioù Karaez a lâre e teuche un toullad brav a zilennidi-rannvro da Garaez da brezegenniñ d'an 19 a viz Du...na bout ne oant ket bet pedet tout ez-ofisiel c'hoazh ! Ha graet souz-adreñv gant meur a hini anezhe p'o deus gouveet e oa bet lakaet o anv war an trakt hep goût dezhe... Met daoust da se e vo deus bodadeg Karaez memes tra, a lavar deomp Mathilde deus ar strollad dizalc'hour Douar ha Frankiz...

Etre 9e hag 1e30 goude kreisteiz e tremeno an traoù ba sal Glenmor Karaez.

Pennad-kaoz gant Tomaz Laken

Penn-komañs an heuliad Peseurt mod 'vez lâret gant Brezhoneg bro Poullaouen gant Frañsez Favro, ur reportaj war ar fed ne vefe ket bet asantet gant ar Senad embarzhiañ ar gwir da ziforc'hañ e Bonreizh Bro C'hall, [ur gronikenn Ouzhpenn ar Vretoned 'zo diwar-benn ar Schibboleth.] (https://www.radiobreizh.bzh/episode/53389)

Er gronikenn "Dastum" 'vez klevet Awenn Plougoulm bet o tastum e Bro-Leon. Kaoz 'vez ganti hirie deus ar c'hontadennoù, ha penaos eo deuet da vezañ konterez a-vicher. Ur gronikenn savet gant Maelle Ausias.
Tudi Kernalegenn, rener BCD-Sevenadurioù, hag Erwan Chartier, paotr ar Poher Hebdo a lak ar gaoz war ar priz nevez-krouet da reiñ ton d'al levrioù diwar-benn Istor Breizh. Kaoz 'vez gante ivez deus al levrioù bet priziet evit 'bloaz. Ur reportaj graet e saloñs al levrioù e Karaez gant Tomaz Laken.
Keleier ar vro hag ar bed 'zo kaset gant Tunvezh Vlagen-Granjean.
E "Pennad-kaoz ar sizhun" e vez klevet Léandre Mandart o respont da Enora Molac diwar-benn ar Manifest bet embannet gant stourmerien ar gallaoueg a-benn kaout muioc'h ar gallaoueg e Breizh-Uhel.
En e gronikenn "Ar hentoù an antroposen" Loeiz Bellec a gomz deomp deus Priz-Nobel ar Fizik ha deus ar roustlerezh kwanteg.
Animet gant Rose Troadeg
Muzik : The Do, The Beach Boys

Ur bern foeriou tro dro d’ar gwin natur a vez gwelet o tifloupañ e Breizh abaoe un nebeut bloavezhioù. En ur bed lec’h 'vez klasket teurel pled deus ar pezh a zebromp en ur c’hlask prenañ digant labourerien-douar a zoujfe deus an endro, e teu ar gwin natur, anat deoc’h, da gemer ur plas bras bar' jeu !
"Les Zingovinotiques" a zo unan deus ar foerioù gwin natur-se. D'an 11 ha d'an 12 a viz Du e teuio un daouzek gwiniour ha gwiniourez deus Bro Anjou, Aveyron, Aude, Roussillon ha lec'h-all c'hoazh, betek Kafe Théodore Lokemo e Bro Dreger, gant un toullad boutailhadoù, deoc'h da dañva ha da brenañ!
Gilbert Lavanant ra parti deus ar skipailh ‘zo drek ar Zingovinotik-se. Eñ ‘zo bet produer ha gwerzher chistr e pad 30 bloaz, hag abaoe pell ez a da foetañ bro, d'ober anaouedegezh gant ar gwiniourien.ezed-se. Hervezañ eo tost an doare d’ober gwin natur deus an doare d’ober chistr natur...Petra eo ar gwin natur, neuze? Setu respontoù Gilbert...
Atersadenn gant Rose Troadeg

Bretagne Culture Diversité ‘zo o paouez lañsañ ur c’houlzad prezegennoù nevez, prezegennoù digoust, digor d’an holl, a vo dalc’het bep miz, peurvuiañ ar gwener kentañ, e mediaoueg an Oriant.
Dimeurzh, ar 15 a viz du, da 6e noz, vo skignet « Bienvenue mister Chang » ha moien eskemm gant ar sevenourez, Laetitia Gaudin-Le Puil, goude ar film.
Tem ar bloaz, choazet gant BCD eo "An divroañ e Breizh", un tem ledan ha pinvidig a ro tro da gomz ha da lakaat war-wel a bep seurt sujedoù drezañ.
Anna Quéré a zo e karg aozañ prezegennoù BCD ha pediñ an dud a zeuio da gaozeal pe da destenniñ enne. Penaos e tremen an traoù ? Setu Anna o reiñ titouroù deomp war danvez ar prezegennoù bet ha da vezañ, respontet he deus dre bellgomz da Rose Troadeg.
Liamm evit tañvadenn film ar meurzh 15 a viz Du :
https://www.bcd.bzh/fr/projection-et-debat-autour-du-film-bienvenue-mister-chang/

Er gronikenn "Dastum" 'vez klevet Awenn Plougoulm kanerez, dañserez a Vro-Leon, bet dastumerez hag hirie a gont istorioù bet c'hoarvezet dezhi pa oa vont da enrollañ tud he korn-bro. Ur gronikenn savet gant Maelle Ausias.
Enora Molac a zo aet da doullañ kaoz gant Daniel Fresneau, prezidant ar gevredigezh Mignoned ar Sinagot, diwar-benn o bag, An Tri Breur, a-raok vefe kaset ar sinagot-se betek chanter Enizenah (l'Ile aux Moines) da vezañ renevezaet.
Keleier ar vro hag ar bed 'zo kaset gant Tomaz Laken.
E "Pennad-kaoz ar sizhun" e vez klevet Paskal Nignol, eñ zo heñtour hag animatour sevenadurel e Mirdi Breizh Roazhon ha Julia Mouazan oa aet da glask gouzout hiroc’h diwar-benn telwennou oadvezh an houarn a zo diskouezet eno.
En e gronikenn "Ar hentoù an antroposen" Loeiz Bellec a gomz deomp deus an douellerien, pe lorberien, diwallit douite !
Animet gant Rose Troadeg
Muzik : Herman Dune, Edel Fox & Neil Byrne

Betek bremañ ne oa priz ebet da lakaat war wel al levrioù a vez embannet bep bloaz diwar-benn istor Breizh. Se zo kaoz eo en em lakaet asambles BCD-Sevenadurioù, Gouel al levrioù en Breizh hag ar Poher Hebdo da grouiñ priz al levrioù diwar-benn istor Breizh. Hennezh a oa bet roet disul e-skeud saloñs Karaez...
Gant levr Krystel Gualdé an hini eo e oa aet ar maout ! Honnezh eo renerez skiantel mirdi istor Kastell duked Breizh. He levr, anvet L'abîme, a gomz deus perzh Naoned ba koñvers an Atlantel hag ar sklaverezh er c'holonioù. Kar bet eo "kêr an duked" ar c'hentañ porzh morianeta er Frañs. Ur bajenn deñval deus istor Breizh en 18vet ha 19vet kantved...
Displegadennoù gant Tudi Kernalegenn, rener BCD hag Erwan Chartier, deus ar Poher Hebdo.

Pennad-kaoz gant Tomaz Laken.

David Guillemois a lak an dud da zañsal e festoù-noz Bro Dreger ha lec'h-all 'boe un ugent bloaz’zo dija. Desket en doa kanañ e gallo, kanaouennoù deus Bro Loudia, gant Marie-Noëlle Le Mapihan, ha goude, kan ha diskan e brezhoneg, gant Ronan Geblez.
Met er pennad-kaoz-mañ e konto deus ur stil-muzik all, disheñvel-krenn : abaoe pell'zo eo sot David gant sonerezh deus an inizi, kanaouennoù kreol pevar c’horn ar bed. Ar repertoir-se a voe sennet gantañ betekhen evitañ e-unan, en un doare prevez, evit ar familh pe mignoned.
Abaoe miz Even en deus graet anaoudegezh gant Paulo Jothy, tabouliner, ha krouet gante o-zaou an daouad anvet « Tomm berv ». Setu muzik blas an heol ganti, kan, akordeoñs, ha taboulinoù : kajun, biguine, sega, maloya, kement kanaouenn en defe bet David un taol-kalon eviti, e kreol, e galleg ha memes e brezhoneg!
Atersadenn gant Rose Troadeg
Evit mont e darempred gant David : tommberv@gmail.com

Kronikenn "Dastum", savet gant Maelle Ausias, a zo diwar-benn Awenn Plougoulm, kanerez, konterez, muzisianez a Vro-Leon. Goude 'vez graet anaoudegezh gant David Guillemois, deus ar strollad Tomm Berv, a gaoze deomp deus penaos eo deuet da vezañ sot gant muzik kreol an inizi, penaos en deus desket ar muzik-se hag azasaet tonioù e brezhoneg zoken! Ar c'heleier 'zo kinniget gant Yuna Kojan. E "Pennad-kaoz ar sizhun" e kont Mari-Klêr Ewen ha he mab Gwilhom da Domaz Laken deus o buhez ha deus o micher labourat an douar e Berlewene, 'kichen Lannuon. Kronikenn Florie Thielin "Ur blantenn, un istor" 'zo diwar benn an Haleg, gant Christine Dubois eus Mael-Karaez.
Animet gant Rose Troadeg hag Enora Molac
Muzik : Boubacar Traoré, Shirley Bergeron, Emezi