Avel em fenn
Radio Bro Gwened
Avel am fenn - Gwener 2 a viz Gwenholon
En abadenn e vez kavet ur reportaj diàr-benn ar gelaouenn "displeg" nevez embannet gant TES, ar gronikenn "Barzaz" a-ziàr fotoioù zo bet tapet gant an teleskop James Webb en oabl don, hag ar lodenn ziwezhañ pennad kaoz ar sizhun e-keñver ar veskl dour dous.
Avel em fenn - d'ar Yaou 8 a viz Gwengolo
Un abadenn gant pevare lodenn Pennad-kaoz ar sizhun diwar benn metanizeur Ploufragan gant Annie Gwilhoù kenbrezidantez Haltes aux marées vertes, div atersadenn gant Gael Roblin ha Brendan Budok evit komz deus ar vanifestadeg a vo d'ar sadorn 10 a viz Gwengolo evit ma vefe lakaet Breizh 'vel un takad stenn a fed lojeiz, ar gronikenn War hentoù an Antroposen war an dour hag A-ramp war'r gomz diwar-benn buhez Reun ar C'halan.
Fest-noz Topariti
N'eo ket tout mont da vakañsiñ war aod ar Vein Ruz 'pad an hañv, ret eo aozañ darvoudoù 'vit an dud o chom 'bar vro a-hed ar bloaz ha plantañ sevenadur Breizh pep lec'h.
Setu pezh mel labour Bleuñwenn Konan, plac'h a Berroz, deuet a-benn da gendrec'hiñ mignoned evit aozañ ur fest-noz bep bloaz e miz Gwengolo e Tavarn Krec'h Beg e Pleuveur Bodou, e traoñ ar Radom mil anavezet.
Setu he neuze o kontañ deomp petra 'vo ar fest-noz ha peseurt tro-spered a zo gante.
Fest-noz Breizh Inn : TekMao, Le Bour - Bodros, Enora & Ivona, David Pasquet, Raavni.
6e30 - 8 €
Baleadenn e Tregorn a-enep kresk Imerys
Ur valeadenn a oa bet disul 4 a viz Gwengolo kostez Groñvel a-enep kresk mengleuz andalouzit IMERYS, ur pezh embregerezh mengleuziañ a fournisa danvez d'an industriezh. Ur gerzhadeg aozet gant Réfrac'terres, kevredigezh tomm ouzh an endro a stourm enep kresk ar garierenn hag he reuzioù niverus. En soñj emañ IMERYS d'ober ur bedervet foz, un toull ouzhpenn, a-benn derc'hen tennañ andalouzit deus douaroù Gerfales, ba Groñvel. Ar meinad-se zo prizius evit fardañ produoù sañset talañ deus ur c'hwrez uhel-uhel, evel ba industriezh ar fonderezh da skouer. En Afrika ar C'hreisteiz e vez tennet andalouzit gant IMERYS ha e kreiz Breizh hend all, e lec'h ma vez tennet gant an embregerezh war-dro ur c'hard deus ar produadur bedel a andalouzit, soñjit 'ta ! Un teñzor diwallet hardî...evel a lavar demp Jean-Daniel Bourdonnay, deus ar strollad [Réfrac'terres] (https://www.facebook.com/R%C3%A9fracterres-107730572051649) ...
Koulzad evit emrenerezh Breizh
Breizh emren ac'hann d'ar bloaz 2032 !
Sell aze ar mennad dispaket da heul an emgav graet e fin miz Eost (2022) ba Karaez gant meur a zek stourmer ha stourmerez emrenour. Hag abaoe zo bet klevet komz deus mennozh an emrenerezh ba meur a gazetenn. Ba Ouest-france, lakomp, eo bet lâret he soñj gant Aziliz Gouez, mouezh-aotreet ar strollad « Breizh a-gleiz » e kuzul Rannvro Breizh. Hag en Télégramme zo bet lennet ur sell enebet war an emrenerezh, hini Bernard Poignant, bet depute ha maer Kemper. Ha sur ha n'eo ket marteze zo bet komzet deus emrenerezh ar bloaz-mañ. Goude 'nije Gérald Darmanin, ministr an diabarzh, disklipet ar ger evit komz deus enezenn Gorsika o deus profitet emrenourien Vreizh evit adlakaat sklêrijenn war o c'hoant da welet ar Stad-c'hall o kas d'ar Vretoned ul lodenn eus ar galloud lezenniñ ha reolennañ, hag o reiñ an tu d'ar c'huzul-rannvro da zastum tailhoù e-barzh ur vro adunanet. Pennad-kaoz gant Alan Kloareg, deus ar strollad dizalc'hour Douar ha Frankiz, a oa bet lañset gante e miz Meurzh ar bloaz-mañ ur galv d'en em unaniñ a-benn gonit an emrenerezh.
Avel em fenn - Yaou 1añ a viz Gwengolo
En abadenn e vo klevet atersadenn Kristof Gwilloù o komz deus ar festival La Noctambullerie a dremeno e Sant-Inan d'an 2 ha d'an 3 a viz Gwengolo, [ar gronikenn Psi diwar-benn gwask ar gevredigezh evit ma vefemp eürus] (https://www.radiobreizh.bzh/episode/52409) , kronikenn barzhonegoù A-ramp war'r gomz o kontañ istor Reun ar C'halan, ha pevare lodenn Pennad-kaoz ar sizhun evit gouzout ma vez perlezennoù 'bar meskl dour dous, mulette perlière en galleg flour.
Avel em fenn - Merc'her 31 a viz Eost
En abadenn e c'hellfet klevet ar gronikenn Peseurt mod 'vez lâret gant Bernard Cabon, a Guimaeg, komz deus bro Dreger vihan ha deus ar prantad pa oa aï al Leoniz er vro-mañ, da c'houde atersadenn an deiz gant Trefina Kerrain, deus mikro Tomaz Laken o tisplegañ penaos eo stad ar bolitikerezh e Lannuon-Treger Kumuniezh just a-raok diviz ar prezidant, Joel Le Jeune, da reiñ e dilez. Ha goude Keleier ar vro e vo klevet Pennad-kaoz ar sizhun gant Roger Kozler ha Pierrick Pustoc'h o kontañ deus ar fed debriñ meskl dour dous, hag ar gronikenn Ouzhpenn ar Vretoned 'zo, kaset gant Benjamin Bouard a Radio Kerne evit echuiñ, da c'houzout hirorc'h war yezh iskisañ ar bed.
Dilezel e garg a ra Joel Le Jeune, prezidant LTK
Joel Le Jeune, prezidant Lannuon Treger Kumuniezh (LTK) 'noa embannet dilun e tileze e garg a-raok fin e resped. Pevarzek vloaz zo emañ an den ouzh ar stur hag un tamm cheñchamant ne ray ket drouk, hervez soñj meur a zilennad eus LTK.
D'ar c'houlz votiñ ar budjed 2022 dija e oa bet un tamm bec'h e kuzul an tolpad-kêrioù, diwar ar mod mag eo bet renet an traoù gant Joel Le Jeune betek-henn, ken e oa en em vodet ur strollad dilennidi enep dezhañ dindan an anv Gouvernance partagée et respectueuse... C'hoant gante ma vefe cheñchet mont-en-dro an tolpad-kêrioù hag e vefe adsoñjet pe nullet meur a raktres boulc'het gant Joel Le Jeune hag e skipailh, evel hini pevarvet pont Lannuon pe c'hoazh hini Park an Diskouezadegoù. Trefina Kerrain, koñsailherez e Lannuon e karg eus ar sevenadur, ar glad hag ar brezhoneg, ha dilennet e LTK, a ro demp he soñj war dilez Joel Le Jeune.
Avel em fenn - Meurzh 30 a viz Eost
En abadenn e vo klevet un atersadenn war eeun gant Florent Grouin a Brezhoweb evit komz deus an deiziataer a vez kinniget gante bep miz, un atersadenn deus ar festival Fisel gant ar strollad Mouilc'hi deus mikro Clara Thabard, eil lodenn Pennad-kaoz ar sizhun diwar-benn ar meskl dour dous gant Roger Kozler ha Pierrick Pustoc'h ha digoradur un heuliad war [plas ar maouezed er politikerezh gall gant Anne Koadig evit ar gronikenn Tamm ha tamm 'vez graet he bragoù da Chann] (https://www.radiobreizh.bzh/episode/52410) .
Sonerezh : Fat White Family, Alela Diane, Delgres, Park
Avel em fenn - Lun 29 a viz Eost
E abadenn gentañ sezon gentañ Avel em fenn e c'hallfet klevañ ar gronikenn [Ur blantenn, un istor] (https://www.radiobreizh.bzh/episode/52394) , gant Isabelle Regnault o kontañ deus al linad, ur [reportaj 'ba Tremargad] (https://www.radiobreizh.bzh/episode/52391) kerzh ur staj kan ha diskan, Keleier ar vro, lodenn gentañ Pennad-kaoz ar sizhun diwar-benn ar meskl dour dous, ur spesad bresk na vez kavet kalz ken. Pierrick Pustoc'h deus Breizh bev a zispleg e peseurt stêr veint kavet c'hoazh ha perak eo ret ma vefe uhel kalite an dour evite. Hag [ ar gronikenn Dastum] (https://www.radiobreizh.bzh/episode/52396) savet evit 50 vloaz ar gevredigezh : buhez Katrin Korvelleg a zo kontet deomp gant Nolwenn Falezan.
Sonerezh : Komodor, A-wa, L'epée, Snaped Ankles