Avel em fenn

Arriuet Miziad ar brezhoneg hag ar gallaoueg! Pouezus eo ar prantad evit lakaat yezhoù ar vro da vezañ klevet er maez deus ar skol evit ar vugale. E Cineville Gwened e veze degemeret kantadoù a vugale deus hentennoù divyezhek bro Gwened Diriaou 2 a viz Meurzh.

Ur reportaj get Enora Molac

Lena Morvan a zo teknisianez mirerez, technicienne de conservation e galleg. He micher a zo sevel un endro evit an oberennoù na vezont ket diskouezet er mirdioù a-benn derc'hel anezhe en stad vat. Kontañ a ra deomp amañ he studioù, penaos e labour gant ar mirdioù, dre m'emañ he an teknisianez mirourez nemerti e Breizh, plas he micher, nevez 'walc'h e bed an arz, plas ar merc'hed ivez hag an diforc'h etre adkempenn un oberenn evit ma vefe brav ha renevezi anezhi a-benn derc'hel anezhi en ur stad vat.

"Evit ar gwir da vezañ ganet, da vevañ, da labourat, da vezañ soagnet ha da zivizout er vro"

Ouzhpenn 100 ti-gwilioudiñ a zlefe bezañ serret er Frañs araok pell. Setu bepred ar pezh a zo erbedet gant Yves Ville, medesin en ospital Necker, e Pariz. Hervez un danevell savet gantañ e vefe dav serriñ an tier e-lec'h ma vez ganet nebeutoc'h evit 1000 a vugale bep bloaz. 7 servij genel bugale zo en dañjer e Breizh. Reoù Gwengamp, Lannuon, Landerne, Karaez, Redon, Ploermael hag Ankiniz.

A-hend-all emañ al lezenn Rist da vezañ lakaet en pleustr e penn kentañ miz Ebrel. Honnezh zo vont da grennañ war goproù uhel ar vedesined a labour en « iñterim ». Abalamour d'al lezenn-se e c'hallfe ar re-se dizertañ an ospitalioù publik ha diwar-se e c'hallfe bezañ serret servijoù en ospitalioù bihanañ.

Disadorn 11 a viz Meurzh e oa bet manifestet gant tud Bro Landerne da zifenn o zi-gwilioudiñ. Hag e Gwengamp, e-lec'h zo trouz serriñ an ti-bugale abaoe 2018, e oa galvet an dud da zibunañ ivez...gant dilennidi GPA, tolpad-kêrioù Gwengamp-Pempoull.
Pennad-kaoz gant Yann-Fañch Durand (Kenurzhierezh Yec'hed e Bro-Wengamp) ha Remi Gwilhouz, maer Plouizi, hag a oa e-mesk an dilennidi bet resevet dilun e Roazhon gant Elise Noguera, renerez nevez Ajañs Rannvro ar Yec'hed (ARS) e Breizh. Embannet oa bet komzoù dinec'hus ar renerez er c'hazetennoù met ar re-se n'o deus ket dinec'het tamm ebet tud Komite difenn ospital Gwengamp. A-hend-all zo raktreset ur vanifestadeg e Karaez disadorn 18 a viz Meurzh da zifenn an ti-gwilioudiñ. Hag eno emañ Komite difenn an ospital da vezañ adlañset dimeurzh kentañ.

Ur gelaouadenn gant Tomaz Laken

A benn Disul 19 e krogay ar festival Pesketourion ar bed, àr-dro da ved ar mor, ar vartoloded, ar sevenadurioù hag ar c'hoñtekstoù e kemm founnabl er bed a-vremañ. Filmoù a feson a zo bet choazet de vout skignet e-pad ur suhuniad e bro An Oriant, muioc'h da glevet get kenbrezidant ar strollad pesketa ha diorren, ha prezidant ar festival Pesketourion ar bed Alan Sann doc'h mikro Yuna Cojean -e penn kommañs an abadenn!

Ehamp en ur brezel kehentiñ... Stank mat an danvez àr an internet hag e pep lec'h er c'hêrioù, danvez da glevout ha da wellout ivez. N'eus ket moian chom hep kehentiñ er bed a-vremañ. Ur sapre junglenn, ehamp e veviñ a-barh! Muioc'h a-ziàr pezh a c'hoarvezh get Florent Grouin karget ag ar broduiñ evit Brezhoweb.

Lena Morvan ar vaouez pedet ar sizhun-mañ. Un deknisianez arbenniget àr gwarn an oberennoù arz er mirdioù, he-unan get ur seurt gouiziegezh e Breizh a-bezh. Kontiñ a ra he labour da Maëlle Ausias (Radio Kreiz Breizh).

Keleier ar vro get Anton Burel ivez!
Un abadenn kaset dre-eeun a Bondi get Enora Molac.

Disadorn 18 a viz Meurzh e vo Bad'Club Rostrenn o tifenn e blas en Top 12 fas da skipailh Talence. O-daou int e lost ar renkamant. Setu e vo ret dezhe stourm an eil ouzh egile a-benn chom e-mesk ar re wellañ ar bloaz a zeu. Un digarez da reiñ deoc'h da glevout ur reportaj graet d'ar sadorn 11 a viz C'hwevrer e-kreiz aergelc'h jiminaz Porzh-Moeloù. En deiz-se e oa bet start an devezh kampionad etrekluboù evit skipailh Rostrenn peogwir e oa e-tal ar gwellañ skipailh a zo e live kentañ ar c'hampionad, hini Fos-sur-Mer. Daou grogad diwar eizh oa aet gant tud Rostrenn hepken. Unan anezhe oa bet gonezet gant Xue Fei Qi hag a zo kampionez Frañs memes tra ! Pennadoù-kaoz gant Milig ar Rouz a c'hoari badminton ba Rostrenn abaoe pell zo ha gant Alice Mahe, harperez Bad'Club Rostrenn abaoe keit all.

Ur reportaj gant Tomaz Laken

Votet Disadorn 11/03 ar raktres lezenn kaset get ar gouarnamant da ampellaat a oad de vonet e retret. Un digarez a feson evit komz ag un elfenn talvoudus evit an dud eh ober harz-labour mar a zeiz da-heul: ar c'hefioù-grev. Un atersadenn get Gaël Roblin (CGT Gwengamp) doc'h mikro Tomaz Laken (Radio Kreiz Breizh).

Adkavit ivez ar c'hronikennoù Yec'hed get Alan Goulwen, a-ziàr mal a touch ar leuni (cancer des reins); hag un Dastum àr Jermen Boutier. Lena Morvan a zo pedet get Maëlle Ausias (Radio Kreiz Breizh) ar sizhun-mañ a vo klevet e dibenn an abadenn.

Keleier ar vro get Erwan Blanchard!
Un abadenn dre-eeun kaset a Bondi get Enora Molac.

A lennegezh e vez kaoz en abadenn-mañ. Fañch Rebours ar skrivagner a vro Goelo doc'h mikro Tomaz Laken (Radio Kreiz Breizh) a-ziàr e levrioù, adkav a rahet ivez ar gronikenn Barzhaz.
Pennad diwezhañ ar reportaj bet graet e skol Jean Rostand e Gourin get klasad divyezheg ar re vras a vo klevet ivez, e kompagnunezh ar skoladerez Nolwenn Tas Le Nouveau, hag ar vugale e kanal (e dibenn an abadenn).

13 loargann a vo e 2023. N'em harpiñ a ra ar sonourez Cécile Pierrot (Ensemble Amaranthe) àr an tem-mañ evit lakaat ar vugale d'ober bourrapl er raktres sonerezh kaset ar blez mañ e Skol Jean Rostand Gourin. Klasad divyezhek ar re grenn n'eus darempredet get ar soner Fabris Malardé d'ar Gwener 3 a viz Meurzh, a oa deuet da ziskouez meur a vinioù dezho. Sonerion ha sonerezed arall a zo tremenet da ziskouez binvioù arall ar suhuniadoù a-raok.

"Ne ouian ket petra 'zo e spered Cécile, ar pal a zo me lakaat d'ober ar memes hent evit ar vugale [...] beviñ a ran ar memes avañtur evito!" eme Nolwenn Tas Le Nouveau ar skolaerez.

Skrivet eo bet tonioù sonerezh get ar c'hompozer Benoit Walther, ha skrivet e vo ar pozioù get ar vugale.

Ur reportaj get Enora Molac.

Alies e vez diskaret kleuñioù war ar maez evit a bep seurt abegoù. Abaoe an adlodennañ e vez lakaet e plas bremañ plañioù evit adsevel kleuñioù. Breizh Bocage zo perzh er plañioù-mañ, arc’hant a vez roet gant ar Rannvro d’ar c’humuniezhioù-kumunioù a-benn goprañ un den evit mont da sevel kleuñioù ha diskouez d’an dud penaos kempenn anezhe. Mes tud zo ac'h a maez al lezenn a-wechoù ivez. Ma zo ur c’hleuñv bennaket e PLU (Plan Local d’Urbanisme) ur gumun eo ret d’an hini en deus c’hoant da ziskar anezhe goulenn aotre digant ar Maer.ez. E Sant-Nikolaz, e miz Meurzh 2022, e oa bet diskaret ur c’hleuñv hag un hent-treuz gant ur peizant a-benn hadañ maiz hep goulenn aotre digant an Aotroù Maer. Mes an Aotroù Maer eo tad ar peizant-se just a-walc'h ! Seurt istorioù a ziskouez breskder ar sistem lec’h omp hag a lak da vezan start ar fed gwarezin ar c’hleunvioù. Ar gevredigezh Hentoù-Treuz e Sant-Nikolaz zo o adkempenn hentoù bale ha kaset neuint ul lizher d’ar c’huzul-kêr a-benn disklêriañ ar fed e kavfent digomprenabl e tremenfe un darvoud maez-lezenn evel-se c'hoazh. Klevet e vefont asambles gant Pierrick Pustoc’h, dilennet e kumun Purid-Kintin hag er CCKB, kumuniezh-kumunioù Kreiz-Breizh.

Ar gouel « Lire à Guingamp » a vo adalek herie ha betek disul ! Ur programm pinvidik zo kinniget d'an dud e kreiz-kêr Gwengamp : ur « saloñs al levrioù », filmoù, diskouezadegoù met ivez taolioù-krenn. Unan eus ar c'haozeadennoù kinniget a vo « ar skrivañ awenet gant Breizh ». Ur gejadenn etre tri skrivagner eus ar vro : Fañch Rebours, Louis Grall ha Daniel Kay. Lusket e vo ar gaoz gant Frañsez Favereau, bet kelenner e skol-veur Roazhon 2. Triwec'h skrivagner ha skrivagnerez a vo gallet ober anaoudegezh gante e-skeud ar gouel a-hend-all. Bretoned met ivez skrivagnerien eus Bro-c'hall, darn o skrivañ evit ar yaouankizoù ha darn all evit an dud deuet. Fañch Rebours, unan eus pluennoù anavezetañ Bro-Oueloù a ro deomp un tañva eus ar gouel hag eus an daol-grenn a vo perzh enni.

Emgav zo roet da unnek eur ba teatr Maez ar Roue...

Pennad-kaoz gant Tomaz Laken