Avel em fenn

Da glevout en abadenn-mañ :

Adreizh ar leveoù kaset get gouarnamant Elisabeth Borne a zo erruet ar sizhun paset en breujoù, ha Dilun en tabutoù foran. Dimeurzh eo an 3vet deiz stourm da-heul galv ar sindikadoù, an harz-labour hag ar vanifestadegoù paset a zo bet heuliet gant un niver bras a dud. Votet get ar studierien·ezed stankadenn mar a Skol-Veur er vro, en o mesk Roazhon 2 ha Segalen e Brest. Distroet omp àr an adreizh get un nebeut tud pedet:
- Guillaume Auffret, dilennet e ti-kêr Gwened, hag a-houde un nebeut deizioù e penn ar strollad Renaissance e Mor Bihan
- Tifenn Siret, ag Unvaniezh Demokratel Breizh
- Anne Koadig, ezelez e Sud hag arbenniget àr an neventioù feminist
- Natacha Ar Gall, skoladerez er prevez

Kronikenn yec'hed: brec'h ar marmous n'eus graet trouz ar blez paset, muioc'h da glevout àr ar c'hleñved e kompagnunezh ar medisin-bet Alan Goulwen.

En abadenn-mañ e oa bet lakaet ar gaoz àr he bugaleaj get Paulette Budès a zo ur plac'h 90 vloaz deus Mael Karaez. Evit e staj e RKB eo bet Yann Boishardy o atersiñ 'nezhi war he buhez e Kreiz Breizh. Setu amañ lodenn gentañ Pennad Kaoz gete, kaset get Maëlle Ausias (Radio Kreiz Breizh).

Adkav a rahet ivez eil lodenn ar gronikenn Dastum war Louiz Kroizer, ur ganerez a Leskoued Gwareg. Enrollet e oa bet get Dominig Jouve. Setu eñ o kontañ an istor-mañ hag o kontañ penaos eo ganet un ton plinn anvezet mat gant an dud hiriv.

Paolette Budes a zo ganet 'ba Kergrist-Moeloù ha bevet he deus 'ba Mel-Karaez. Kontañ 'ra he buhez, deus mikro Yann Boishardy, bet stajiad e RKB. Klevet 'vo o teskrivañ ar vuhez en ti feurm pa oa bugel, plas ar relijion er familh, ar gouelioù hag he labour gant he poulailheroù.

Ha perak pas mont er maez evit deskiñ kontañ ? N’eo ket ken simpl ha se kinnig ur mintinvezh er maez gant bugale ar skol-vamm ha skol kentañ derez. Sikour da grouiñ ul liamm yac’h etre ar vugale hag an natur, dezho da vezañ dedennet ganti evit gellet gwareziñ anezhi gwelloc’h, gwellaat o yec’hed, reiñ fiziañs enne hag ivez gwellaat o aketusted, o memor hag o c’hoant da zeskiñ, setu arguzennoù brassañ ar skol er maez.
Bet eo Radio Kreiz Breizh e skol publik divyezh Poullaouen ur merc’her mintin evit gwelet penaos tremen ar mintinvezh gant Julia Keller, skolaerez e penn ar skol er maez er skol-mañ ha Marie Miguet skolaerez evit an 13 bugel en hentenn divyezh.
War un dachenn en tu all d’an hent e weler geot, ur c’hleuñv vihan, tammoù koad evit azezennoù ha lochoù en osilh. Eno e vez skolaerezed skol-vamm Poullaouen o lakaat ar vugale da selaou al laboused, da redek evit kavout al liv mat en urzh mat, hag oc’h ober soubenn pe ul leur brennheskenn el loch osilh. C’hoari, deskiñ, ober an traoù asambles, setu programm ar mintinvezh er maez.
Maïwenn Salomon a zo renerez skol publik Gwengamp. Lakaet he deus en plas ivez ar merc’hervezh mintin er maez gant ar skol a-bezh. Displegañ ‘ra deomp penaos tremen an traoù.

‘Vel bep bloaz e vez divizet gant ensellerezh an deskadurezh vras serriñ klasadoù ‘zo. Ar bloaz-mañ eo bet divizet serriñ 47 klas e Aodoù an Arvor, dreist-holl ‘ba skolioù bihan ha digeriñ 13 klasad dreist-holl ‘ba bro Dinan ha Gwengamp. E RPI (Regroupement Pédagogique Intercommunal) Karnoed, Puskelleg ha Plourac’h eo bet lâret div sizhun ‘zo e vefe serret ur c’hlasad.
Hervez Anne Koadig deus ar sindikad Sud Deskadurezh e vez klasket gant an ensellerezh adpakout an dale serriñ klasoù a oa bet tapet kerzh an enkadenn Kovid. D’an 2 a viz C’hwevrer e vo dilennidi ar c’humunioù lec’h ma ‘vo serret klasoù ‘zo dirak an ensellerezh e Sant-Brieg evit difenn o skolioù ‘vel m’emaint.
Aï eo ankeniet bras an tri maer ha tud ar c’humunioù, Yannick Larvor a zo maer Plourac’h.

E 1987 e skriv Françoise Thyrion ur pezh c'hoari anvet "Molière par elle-même". Ur pezh c'hoari gant ur gomedianez o kontañ istor buhez Jean-Baptiste Poquelin, alias Molière. Pezh 'zo e erru Molière e kreiz ar pezh c'hoari evit reiñ e ali. Ur pezh c'hoari gant ur gomedianez war al leurenn o c'hoari e zudenn hag hini Molière.
Nolwenn Korbell a c'hoari an abadenn-mañ e brezhoneg kontañ a ra deomp penaos he deus labouret ar pezh-c'hoari, petra eo sell ar c'hoariva ha Molière er pezh-c'hoari-mañ.

D'ar sadorn 28 a viz Genver 2023 e vo un devezh tro-dro d’an dour e Tremargad. Da c’houde ar sec’hor a zo bet ‘pad an hanv ha stad an natur hag an dour ez eus bet ur strollad o n’em sevel : Eau S’cours e anv. Goude bezañ bet n’em ditouret war an doare da verañ an dour er vro, ar saotradur padus hag an doare ma ‘vez degaset an dour d’an dud eo bet savet un devezh a-benn titouriñ an dud ha lakaat ar sitoaianed d’em soñjal war un doare da stourm e pep kumun evit kaout dour propr. Kazi ur bloaz ‘zo e oa bet ur stourm e Sant Vaeg ‘blam oa re saotret an dour ha neuze mesket da vat gant un dour all, propoc’h, hini lenn Kerne Uhel, e Tremargad. Marilia Petite deus ar strollad Eau S'cours ha Dorig Kraz deus ar gevredigezh GAT a aoz ar fest-noz deus noz, a zispleg deomp petra 'vo d'an 28 a viz Genver e Tremargad.

Marse ho peus klevet komz ag ur seurt « giz » nevez, anvet an « nobra ». Donet 'ra ag ar saozneg, sinifi 'ra brennidenn ebet, (sans soutien-gorge). Sinifi 'ra eh eus maouezed ne lak brennidenn ebet ken. Evit abegoù disheñwal, a vo displeget un tammig er sujed-mañ.

N'eo ket nevez neoazh choaz da baouez lakaat brenidoù. Maouezed 'zo n'o doa ket gortozet ar prantad bac'hiñ ketañ e 2020 evit paouez o lakaat. Er bleadoù 70 da skouer, ha goude. Strolladoù feminist & politikel o deus choket ar gevredigezh mar a wezh en ur ziskouez o divronn (Femen, Free the nipple hag arall). Maouezed ar bobl o doa gwisket ur roched e-dan o saeoù e-pad kantvedoù ha setu tout, e-raog e arrivfe korvkennoù (des corsets) pe traoù arall n'eus ket pell 'zo.

Amañ e vo komzet kentoc'h ag ar fed paouez just da lakaat un dra benneg evit "souten" an divronn, war ar bemdeiz, e-dan an dilhad: t-shirtoù saeoù hag arall. 8 maouez etre 21 ha 60 vlez, mentoù divronn disheñvel mat ivez, o deus asantet komz frank deus o divronn hag o feson da welet o c'horf. Trugarez da Lena, Anna, Camille, Manon, Aziliz, Lena, Marilou ha Mélanie (lod deus an anvioù a zo bet cheñchet) evit o zestenioù talvoudus.
Evit 6 anezo eo cheñchet o sell war o c'horf hag o divronn goude bezañ paouezet lakaat brenidoù, aesoc'h evito n'em gavout mat ganto.


Ur sujed kaset gant Enora Molac (Radio Bro Gwened).

Unan deus ar re o deus kaset kalzig a draoù, dreist holl a fed sonerezh hengounel e Bro Dreger gant binviji a bep seurt a zo bet desavet e Pariz ha deuet e bro e dud gant ar c’hoant kreñv tapout tonioù hengounel gant binviji na vezent ket implijet kement-se ken ha da zeskin ‘ne goude d’ar re vras ha d’ar re vunud ‘pad bloavezhioù e skol sonerezh Lannuon. Bernard Lasbleiz e anv. Setu neuze e desteni, e istor, deus e veaj e Bro Skos lec’h ‘n eus kejet gant tud a enrolle sonerezh ha kanaouennoù er bloavezhioù 70 betek 1996, pa 'n oa leusket e plas prezidant Dastum Bro Dreger da Julien Cornic.

D'ar 5 a viz Genver en devoa [prefed Aodoù-an-Arvor nac'het reiñ an aotre da sevel teir rod-avel war Menez Hogene] (https://www.cotes-darmor.gouv.fr/content/download/59126/411437/file/Louargat%20-%20PE%20Du%20Men%C3%A9%20Hoguen%C3%A9-AP%20Refus%20AE.pdf) . Hervez diell ar prefeti e tiskouez ar studi war an efejoù e cheñchfe dremm ar vro ha buhez an dud gant an tourioù-avel-se. Gwelet e vefent deus krec'h tosenn Vre, ul lec'h gwarezet, ha deus bourk Louergad. Embann a ra ar prefed ivez eo dleet gwareziñ Menez Hogene ha derc'hen tost dezhañ a-benn kas d'ar rummajoù o tont ar glad naturel-se. Setu aze ur pennad-kaoz gant tud ar gevredigezh Vents Contr'airs bet enrollet pemzektez zo (a-raok na vije embannet diviz ar prefed). Selaouit Michel, Jean-François, Céline ha Max.

Dont a ray ar gazetennerez Sioux Berger da Louergad da ginnig he bandenn-dreset Le Prix du vent d'an 3 a viz C'hwevrer.

Pennad-kaoz gant Tomaz Laken

E-kreiz miz Kerdu e oa bet roet aotre gant prefed Aodoù-an-Arvor d'an embregerezh Engie da sevel ur metanizer e takad ar Châtelets, e Ploufragan, e-tal Sant-Brieg. Un uzin a zo sañset da vont en-dro adalek miz Gwengolo 2024. Gant meur a gumun tro-war-dro e oa bet votet a-enep ar raktres met n'int ket bet klevet gant dileuriad ar Stad war a seblant. Annie Gwilhoù, kenbrezidantez ar gevredigezh Halte aux marées vertes, a lâr demp perak ne oa ket bet souezhet gant diviz ar prefed...